Categories
कोरोना देश ब्यापार मुख्य

सरकारको बजेट तयारी : वृद्धभत्ता बढाउने, स्टार्टअपलाई कर छुट लगायत यस्ता छन नयाँ योजनाहरु

काठमाडौं । प्रतिनिधिसभा विघटनको अवस्थामा सरकार बजेटको तयारीमा छ । जेठ १५ गते बजेट ल्याउनैपर्ने संवैधानिक प्रावधान रहेकाले अर्थका अधिकारीहरु धमाधम बजेट लेख्दै छन् ।

संघीय संसदका दुबै सदनहरुको संयुक्त बैठकमा राष्ट्रपतिबाट वाचन हुने नीति तथा कार्यक्रम  अध्यादेशमार्फत नै आउँदैछ । बजेट पनि अध्यादेशमार्फत नै आउने भएको छ । जेठ १५ अघि नै नीति तथा कार्यक्रम आउनुपर्ने भएपनि कुन दिन आउँछ भन्ने टुंगो छैन ।

कति आउँदैछ बजेट ?

मध्यमकालीन खर्च संरचना अनुसार आगामी आर्थिक वर्ष २०७८/०७९ को बजेटको आकार १६ खर्ब ९७ अर्ब ५७ करोड रुपैयाँ हुनेछ । यो सिलिङभित्र रहेर अधिकांश पूराना आयोजनालाई बजेट छुट्याउने तयारीमा अर्थ मन्त्रालय छ ।

कोरोना भाइरसका कारण थिलथिलो बनेको अर्थतन्त्रलाई चलायमान बनाउने गरी बजेट आउने अर्थमन्त्री विष्णु पौडेलको दाबी छ । सरकारको दीर्घकालीन सोच २१००, पन्ध्रौँ योजनाको लक्ष्य, दिगो विकासका लक्ष्य र कोरोनाले पारेको मर्कामा केन्द्रित रहेर बजेट लेख्ने काम भईरहेको छ ।वृद्धभत्ता बढ्दै

वर्तमान सरकारको चुनावी नारा ‘वृद्धभत्ता ५ हजार पुर्याउने’ भन्ने थियो । तर, लगातार ३ वट बजेट ल्याउँदा पनि वृद्धभत्ता ५ हजार पुग्न सकेको छैन । तर, यसपालीको बजेटमार्फत वृद्धभत्ता बढाएर मासिक ५ हजार रुपैयाँ पुर्याउने उद्घोष प्रधानमन्त्री केपी शर्मा ओलीले सार्वजनिक रुपमै गरिसकेका छन् ।

अनाथ बालबालिका, अपांगता भएका व्यक्तिहरु र एकल महिलाका लागि विशेष कार्यक्रम सञ्चालन पनि हुँदैछन् ।

तलब बढाउने संकेत

सर्वोच्च अदालतबाट संसद पुनःस्थापना नभएको खण्डमा आगामी कार्तिक २६ र मंसिर ३ गते निर्वाचन हुँदैछ । यस अर्थमा अब आउने बजेट चुनावी बजेट पनि हो । त्यसैले लोकप्रीय कार्यक्रम ल्याउनुपर्ने प्रेसर सरकारलाई छ ।

त्यसकारण निजामति कर्मचारी र सुरक्षाकर्मीको तलब बढाउने तयारी सरकारको छ । स्रोतका अनुसार तल्लो तहका कर्मचारीको तलब १५ प्रतिशतसम्म बढ्नेछ । तर, यस विषय भने आधिकारिक रुपमा बाहिर आएको छैन ।

स्टार्टअपलाई कर छुट र खानी उत्खनन्

‘स्टार्टअप बिजनेस’ लाई कर छुटको माग उद्योग वाणिज्य महासंघले गर्दै आएको छ । सोही अनुसार आगम िवर्षको बजेटमार्फत स्टार्टअप बिजनेसलाई ५ वर्षको कर छुट दिन लागिएको छ ।

नेपालमा विभिन्न धातुहरुको खानी भएको अनुमान गरिँदै आएको छ । कतिपय समयमा भएका अध्ययनहरुले धातुहरु भएको देखाएको पनि छ । तर, अन्वेषण र उत्खनन् हुन सकेको छैन ।

तर, आगामी आर्थिक वर्षमा तामा, सुन, युरेनियम र फलाम खानीको अन्वेषण गर्ने कार्यक्रम आउँदैछन् । तामा, सुन र युरेनियमको खानीको अन्वेषण गर्ने र फलाम खानी भने उत्खनन् नै गर्ने योजनामा सरकार रहेकाले सोही अनुसार बजेट आउने दाबी गरिएको छ ।

रोजगारीमा नयाँ कार्यक्रमको घोषणा हुँदै

प्रधानमन्त्री रोजगार कार्यक्रम खासै फलदायी नभएको निष्कर्षमा प्रधानमन्त्री स्वयम् पुगेका छन् । निर्माण क्षेत्रले भन्दा कृषि क्षेत्रले बढी र छिटो रोजगारी सिर्जना गर्ने भएकाले आगामी आर्थिक वर्षको बजेटमार्फत ‘प्रधानमन्त्री जडीबुटी तथा कृषि वन रोजगार कार्यक्रम’को घोषणा हुँदैछ ।

निश्चित समय र ज्याला तोकेर कृषि र जडिबुटीबाट वर्षमा कम्तीमा १ लाखलाई रोजगारी दिने लक्ष्य लिईएको छ । नयाँ कार्यक्रम घोषणा भएपछि प्रधानमन्त्री रोजगार कार्यक्रम खारेज नभई त्यसैलाई परिमार्जन गरेर चलाउने तयारी छ ।

मल कारखाना खोल्ने घोषणा हुँदै

सरकारले वर्षेनी ब्यहोर्नु परेको रासायनिक मलको अभाव पुर्ति गर्न नेपालमै मल कारखाना स्थापना गर्ने भएको छ ।

प्राकृतिक ग्यास प्रविधिमा आधारित मल कारखाना स्थापना गर्न १ खर्ब ३ अर्ब रुपैयाँ सुरुमा लागत लाग्ने र वाटर इलेक्ट्रोसिस प्रविधिमा आधारित रासायनिक मल कारखाना स्थापना गर्न सुरुमा १ खर्ब ८९ अर्ब रुपैयाँ लाग्ने अध्ययनले देखाएको छ  ।

यी बाहेक स्वास्थ्य र शिक्षामा हरेक स्थानीय तहमार्फत बजेट विनियोजन गरेर स्तरीय शिक्षा र स्वास्थ्य उपचारको प्रवन्ध गर्ने कार्यक्रम पनि प्राथमिकतामा राखिएको छ ।

किसानलाई सहुलियतमा ऋण, कृषि उपजको बजारीकरण, निर्यात गर्ने उद्योगी व्यवसायीलाई कर छुट जस्ता लोकप्रीय कार्यक्रम यसपाली बजेटमार्फत समेटिने देखिएको छ ।बिजमाण्डुडटकमबाट

Categories
देश ब्यापार मुख्य

बंगलादेशको युरिया मल नेपाल आईपुग्यो

पर्सा । सरकारले बंगलादेशबाट खरिद गरेको युरिया मलको पहिलो लट वीरगन्ज आइपुगेको छ । करिब २ हजार ५ सय टन युरिया मल बोकेको एउटा रेलवे र्‍याक मंगलबार वीरगन्जस्थित सिर्सिया सुक्खा बन्दरगाहमा आइपुगेको कृषि सामग्री कम्पनी प्रदेश कार्यालय वीरगन्जका प्रमुख गोरखनाथ केसीले जानकारी दिए ।

हाल बंगलादेशले दिएको ५० हजार टन युरियामध्ये २२ हजार ५ सय टनको पहिलो लट भारतको कोलकाता बन्दरगाहमा आएको हो । त्यसमध्ये ५ हजार ६ सय २५ टन कोलकाताबाट सोझै ट्रकमा विराटनगर लगिँदै छ । बाँकीमध्ये नौ हजार टन युरिया वीरगन्जको सीमापारि भारतीय सहर रक्सौल रेलवे स्टेसनमा आउँदै छ । त्यहाँबाट ट्रकमा ढुवानी गरी मल वीरगन्जसम्म ल्याइनेछ ।

सिर्सिया सुक्खा बन्दरगाहमा रेलबाट ७ हजार ८ सय ७५ टन युरिया ल्याइनेछ । रक्सौल र वीरगन्जमा आउने युरिया मल डेढदेखि दुई सातासम्म आइसक्ने केसीको अनुमान छ । एक रेलवे र्‍याकले सरदर २ हजार ५ सय टन मल बोक्न सक्छ । बंगलादेशले दिने बाँकी २७ हजार ५ सय टन युरिया मल कहिले आउँछ भन्नेबारे आफूलाई यकिन जानकारी नरहेको केसीले बताए । ‘हाललाई दुवै देशका सरकारले जीटूजी माध्यमबाट मल खरिदबिक्री गरेका हुन्,’ उनले भने, ‘बाँकी मल कहिले आउँछ, त्यसबारे हामी अनभिज्ञ छौं ।’ ईकान्तिपुर

Categories
देश ब्यापार मुख्य

प्रदेश एक होटल व्यवसायी महासंघको अध्यक्षमा दमकका राजन दंगाल निर्विरोध

दमक । होटल व्यवसायी महासंघ प्रदेश नम्बर १ को  अधिवेशनले दमकका होटल व्यवसायी राजन दंगालको अध्यक्षतामा नयाँ नेतृत्व चयन गरेको छ । सोमबार विर्तामोडमा सम्पन्न प्रदेशस्तरीय अधिवेशनले दंगालको अध्यक्षतामा नेतृत्व चयन गरेको हो ।  दंगाल करिब डेढ दशकदेखि दमकमा होटल व्यवसाय सञ्चालन गर्दै आएका व्यवसायी हुन् । दंगालको अध्यक्षतामा सर्वसम्मत चयन भएको महासंघको प्रदेश समितिको वरिष्ठ उपाध्यक्षमा महेन्द्र ढुङ्गाना, उपाध्यक्षमा देवी प्रसाद पौडेल, जे पी राई, गोविन्द थापा महासचिवमा बासु बराल, सचिवमा शिव अधिकारी , सहसचिव दिल कुमारी श्रेष्ठ , कोषाध्यक्षमा इन्दिरा श्रेष्ठ सह कोषाध्यक्षमा राजन प्रधान चुनिएका छन् ।

त्यसैगरी सदस्यहरुमा प्रेम सापकोटा ,लाल बहादुर श्रेष्ठ ,पुनम थापा मगर, पदमलाल लम्साल ,बिमल भण्डारी, दिनेश खनाल ,पोक्षरन्त पोखरेल निर्विरोध निर्वाचित भएका जनाइएको छ । महासंघका प्रदेश अध्यक्ष मनिन्द्र कटुवालको अध्यक्षता र विर्तामोड नगरपालिकाका प्रमुख ध्रुव शिवाकोटीको प्रमुख आतिथ्यमा साइ पाटी प्यालेस विर्तामोडमा सो अधिवेशन सम्पन्न भएको थियो ।

Categories
देश ब्यापार मुख्य

दमकमा साताव्यापी फुड फेस्टिवल हुने

सुमित भण्डारी

झापा : झापाको दमकमा सातौ दमक फुड फेस्टिवल २०७७ हुने भएको छ । होटल व्यवसायी संघ दमकको आयोजनामा यसबर्ष पनि फागुन २३ देखि फागुन २९ गतेसम्म दमकको पशुहाटमा दमक फुड फेस्टिबलकाे आयोजना गरिएको संघले जनाएको छ ।

दमक क्षेत्रको आर्थिक , सामजिक तथा साँस्कृतिक बिकासका लागि आन्तरिक, धार्मिक, पर्यटकीय तथा स्थानीय जनजातिका परिकारको प्रचारप्रसार गरि दमक क्षेत्रलाई आन्तरिक पर्यटन भित्र्याउने लक्ष्यको साथ कार्यक्रम आयोजना गरिएको कार्यक्रमका संयोजक भुपेन्द्र प्रसाद न्यौपानेले जानकारी दिए ।

महोत्सवमा दैनिक उपभोग्य बस्तु तथा सेवाहरुको प्रदर्शनी तथा खरिद बिक्रि, चिया प्रदर्शनी, ख्यातिप्राप्त राष्ट्रिय तथा स्थानीय कलाकारहरु द्वारा दैनिक साङ्गितिक कार्यक्रम, स्थानीय भेषभुषा झल्कने विभिन्न साँस्कृतिक कार्यक्रम, विभिन्न जातजातिको खानाको परिकारहरुको स्टल हरु रहने आयोजकले जनाएको छ ।

कार्यक्रमका सफलता पुर्बक सम्पन्न गर्न भुपेन्द्र न्यौपानेको संयोजकत्वमा मुल समिती र अन्य विभिन्न उपसमिति हरु पनि गठन गरिएको छ ।

जसमा भुपेन्द्र न्यौपानेको संयोजकत्वमा तीन सदस्यीय आर्थिक उपसमिति, काजी राउतको संयोजकत्वमा प्रचारप्रसार,गणेश अधिकारीको संयोजकत्वमा स्टल व्यवस्थापन,योगराज दंगालको संयोजकत्वमा सुरक्षा उपसमिति,मदन ढकालको संयोजकत्वमा सांस्कृतिक उपसमिति,सुधिर प्रधानको संयोजकत्वमा अतिथि सत्कार र नन्द प्रसाद चम्लागाईको संयोजकत्वमा मञ्ज व्यवस्थापन उपसमिति गठन गरिएको पत्रकार सम्मेलनमा जानकारी दिएको छ ।

मूल समितिका अतिरिक्त उपसमितिहरुले आआफनो तर्फबाट आवश्यक तयारी धमाधम गरिरहेका संघका अध्यक्ष राजेन्द्र दंगालले बताए । सो फेस्टिबलमा करिब एक लाख अवलोकनकर्ताहरु आउने र करिब ५० लाख बराबरको व्यवसायिक कारोबार हुने अनुमान गरिएको उनले बताए ।

फेस्टिबल सम्पन्न गर्न दमक नगरपालिका र पर्यटन बोर्डले समेत सहयोग गर्ने छ भने प्रबेश शुल्क रु १०० कायम गरिएको संघले जनाएको छ ।

Categories
देश ब्यापार मुख्य

खाना पकाउने ग्याससहित पेट्रोल डिजेलमा मूल्य वृद्धि

काठमाडौं। नेपाल आयल निगमले पेट्रोलियम पदाथमा मूल्य वृद्धि गरेको छ। निगमले गएराति १२ बजेदेखि लागू हुने गरी खाना पकाउने ग्यासको मूल्य २५ रुपैयाँले बढाएर एक हजार चार सय रुपैयाँ पुर्‍याएको छ।

निगमले विज्ञप्ति जारी गरी पेट्रोल, डिजेल र मट्टितेलमा प्रतिलिटर दुई रुपैयाँ बढाएको जनाएको छ। नयाँ मूल्यअनुसार अब पेट्रोल प्रतिलिटर ११२ रुपैयाँ, डिजेल र मट्टितेलको प्रतिलिटर ९५ रुपैयाँ कायम गरिएको छ। निगमले हवाई इन्धनको मूल्य भने यथावत कायम राखेको छ।

Categories
देश ब्यापार मुख्य

दमकमा धिमाल फुड फेष्टिबल सुरु

दमक। आदिबासी धिमाल समुदायको खाद्य परिकारको प्रवद्र्धन र संस्कृतिको संरक्षण गर्ने उद्देश्यले आजदेखि झापा दमकमा धिमाल फुड फेष्टिबल सुरु भएको छ ।

“संस्कृति, मौलिकता र स्वस्थ्य खाना” मूल नारा दिई चिचिरी–गेन्द्रो दिवस भनी धिमाल जातिय विकास केन्द्रले आफ्नो मौलिक सांस्कृतिक परिकार प्रवद्र्धनका लागि दमकमा धिमाल फूड फेष्टिबल शुरु गरेको हो ।
प्रदेश १ का आन्तरिक मामिला तथा कानून मन्त्री हिक्मत कार्कीले फेष्टिवलको उद्घाटन गरेका छन् । प्रमुख अतिथि कार्कीले नेपालको मौलिकताको संरक्षण र आर्थिक समृद्धीका लागि पर्यटन सबै भन्दा सहयोगी पक्ष रहेको बताए । कोरोना भाईरसको महामारीका कारण पर्यटन क्षेत्र संकुचित बनेको समयमा आयोजना गरिएको धिमाल फुड फेष्टिबल कार्यक्रमले संस्कृति संरक्षण र आन्तरिक पर्यटन प्रवद्र्धनमा पनि सहयोग पुग्ने विश्वास भएको बताए ।

फेस्टिबल आजदेखि फागुन १ गते सम्म चल्नेछ । फेष्टिबल आयोजक समिति संयोजक शान्ति देवी धिमालका अनुसार फेष्टिबलमा २०वटा विभिन्न स्टल रहेका छन् । ति स्टलमा जातिय खानाहरु विक्रि तथा प्रदर्शनका लागि राखिएको बताइन् ।

धिमाल फुट फेष्टिबलमा समुदायको परम्परागत खाद्य परिकार चिचिरी र गेन्द्रोलाई जोड दिईएको छ । चिचिरी धिमाल समुदायमा विसेश प्रकारको चामलबाट पकाईने र गेन्द्रो पिठोबाट पकाईने परिकार हो । यिनैको नामबाट महोत्सवको नामाकरण गरिएको केन्द्रिय सदस्य अजितकुमार धिमालले जानकारी दिए । चिचिरी एक प्रकारको लस्सायुक्त धानको चामलबाट तयार पारिन्छ । खास गरि विवाह गरेकी चेली माईत आउँदा कोशेलीको रुपमा यो परिकार ल्याउने गरिएको गरिन्छ । माईत आएकी चेली तथा ज्वाईलाई स्वागतका लागि गेन्द्रो खुवाउने चलन छ । गेन्द्रो सोहि चामलको पिठोबाट पातमा पकाउने गरिएको छ ।

धिमाल समुदायका विभिन्न खाद्य परिकारहरुको संरक्षण तथा प्रवद्र्धन गर्ने उदेश्यले फेष्टिबलको आयोजना गरिएको केन्द्रका अध्यक्ष लोकबहादुर धिमालले बताएका छन् । धिमाल समुदायका कतिपय संस्कृति, पोशाक, बाजा तथा परिकार धिमाल समुदायकै नयाँ पुस्ताले विर्सदै गएकाले उनीहरुलाई चिनाउन र अन्य समुदायमा समेत धिमाल संस्कृति बारे जानकारी गराउन फेष्टिबल सहयोगी हुने उनको भनाई छ । कार्यक्रमलाई संगीतमय बनाउन राष्ट्रिय कलाकारहरुको समेत प्रस्तुति रहने केन्द्रका महासचिव मात्रिका धिमालले बताए ।

फेष्टिबलमा आकर्षणका लागि दैनिक विभिन्न राष्ट्रिय कलाकालहरुको प्रस्तुती रहने केन्द्रका केन्द्रिय सदस्य मणिराज धिमालले बताएका छन । दमक नगरपालिकाको विशेष सहयोग रहेको फेष्टिबललाई झापा तथा मोरङ्का विभिन्न स्थानीय तहले सहयोग गरेका छन् ।

झापा र मोरङ्मा सघन तथा सुनसरीका केहि क्षेत्रमा परम्परागत बसोबास रहेको धिमाल जातिलाई झापाको दमक तथा मोरङको पथरी र बेलबारी नगरपालिकाले प्रथम नागरिक घोषणा गरेका छन् । २०६८ सालको जनगणना अनुसार धिमाल जातिको जनसंख्या २६ हजार २ सय ९८ रहेको छ ।

कार्यक्रममा दमक नगरपालिकाका प्रमुख रोमनाथ ओली, आदिबासी जनजाति महासंघका महासचिव नित्यानन्द ताजुपुरीया लगायतका वक्ताले सवै जाति तथा समुदायको संस्कृति संरक्षणका लागि तिनै तहका सरकारहरु लाग्नु पर्नेमा जोड दिएका थिए ।

Categories
देश ब्यापार मुख्य

दमक उद्योग वाणिज्य संघको साधारणसभामा व्यवसायीलाई सम्मान , संचारकर्मी पुरस्कृत

दमक । दमक उद्योग वाणिज्य संघको २९ औं बार्षिक साधारणसभाको अवसरमा दुईजना सफल युवा व्यवसायीलाई सम्मान गरिनुका साथै एकजना सञ्चारकर्मीलाई पुरस्कृत गरिएको छ ।

संघले उत्कृष्ट व्यवसायीका रुपमा व्यवसायीद्वय इन्द्रसेन अग्रवाल र इन्दिरा बाँस्कोटा (भट्टराई) लाई सम्मान गरेको हो ।

त्यसैगरी संघको आजीवन सदस्यता प्राप्त गर्ने दमकका बिद्युत व्यवसायी दयासागर आचार्य र किराना व्यवसायी विष्णु साह तेलीलाई पनि सम्मान गरिएको छ । आचार्य र साहले संघको आजीवन सदस्यता लिई जीवनभर व्यवसायमा समर्पित रहने निधो गरेका कारण उनीहरुलाई आजीवन सदस्यता प्रदान गरिएको संघका वरिष्ठ उपाध्यक्ष एवं साधारणसभा तयारी उपसमिति संयोजक गोपाल गुरागाइँले जानकारी दिए ।
सभाकै अवसरमा दमकको उद्योग व्यवसाय क्षेत्रमा कलम चलाएर सञ्चारका माध्यमबाट योगदान पुरयाएवापत सञ्चारकर्मी जीवन चुँडाललाई पुरस्कृत गरिएको छ । संघले विगत ४ बर्षयता हरेक बर्ष साधारणसभाको अवसरमा एक जना सञ्चारकर्मीलाई वाणिज्य पत्रकारिता पुरस्कारबाट पुरस्कृत गर्दै आएको छ । उनीहरुलाई नेपाल उद्योग वाणिज्य महासंघका गाउँ – नगर उपाध्यक्ष दिनेश श्रेष्ठले पुरस्कार तथा सम्मान प्रदान गरेका थिए ।साधारणसभामा संघका वरिष्ठ उपाध्यक्ष समेत रहेका साधारणसभा तयारी उपसमितिका संयोजक देवीप्रसाद गुरागाईले स्वागत मन्तव्य राखेका थिए भने अध्यक्ष गोकुल श्रेष्ठले अध्यक्षको प्रतिवेदन प्रस्तुत गरेका थिए ।

साधारणसभाको वन्दसत्रमा संघका प्रथम उपाध्यक्ष राजु खड्काले बार्षिक प्रतिवेदन,द्वितीय उपाध्यक्ष समेत रहेका व्यावसायिक हितकोष कार्यक्रम सञ्चालन समितिका संयोजक राजकुमार योङयाले विषयक बार्षिक प्रतिवेदन ,लेखा समितिका तर्फवाट लेखा संयोजक खोमप्रसाद वगालेले लेखा प्रतिवेदन ,तृतीय उपाध्यक्ष रमा लिम्बुले आर्थिक प्रतिवेदन प्रस्तुत गरेकी थिईन् ।
कार्यसमितिका तर्फबाट प्रस्तुत गरिएका विभिन्न प्रतिवेदनहरु साधारणसभाको बन्दसत्रले सुझावसहित पारित गरेको छ ।

Categories
देश ब्यापार मुख्य

मुसाले तार काटेपछि प्रदेश १ मा ६ घण्टा टेलिकमको सेवा अवरुद्ध

झापा । नेपाल टेलिकम दूरसञ्चार कार्यालयको सेवा प्रदेश १ मा आइतबार बिहानैबाट अवरुद्ध बन्न पुगेको छ ।

बिहान ३ बजेतिरबाट अवरुद्ध बनेको सेवा सञ्चालन गर्न झन्डै छ घण्टाभन्दा बढी समय लागेको थियो । महोत्तरीको बर्दिवासमा मुसाले अप्टिकल फाइबरको तार काटिदिएपछि सेवा सञ्चालनमा समस्या भएको थियो ।

मुसाले तार काटिदिएर फइबरको लिंक नै टुटेपछि उत्पन्न भएको समस्याले सेवा अवरुद्ध सञ्चालन हुन नसकेको नेपाल टेलिकम प्रादेशिक निर्देशनालय प्रदेश १ विराटनगरका प्रबन्धक राजेन्द्र महर्जनले जानकारी दिए । मर्मत सम्भारपछि बिहान ९ बजेबाट सेवा सूचारु भएको उनले बताए ।

सेवा अवरुद्ध हुँदा छ घण्टासम्म प्रदेश राजधानी विराटनगरसहित प्रदेशका १४ वटै जिल्लामा टेलिकमको मोबाइल, ल्याण्डलाइन टेलिफोन र इन्टरनेट सेवा सञ्चालन हुन नसकेको उनको भनाइ छ । महर्जनकाअनुसार प्रदेशमा टेलिकमका २० लाखभन्दा बढी ग्राहाक छन् । एक्कासि सेवा अवरुद्ध भएपछि ठूलो संख्यामा रहेका ग्राहाक एकै पटक प्रभावित बनेका थिए ।

Categories
देश ब्यापार मुख्य

‘मर्न र मार्न तयार छौं तर बस्तीमा इँटाभट्टा खोल्न दिदैनौ’- कमल गाउँवासी

गौरादह । झापाको कमल गाउँपालिकामा वातावरण प्रदूषणलाई बेवास्ता गर्दै घना मानवबस्ती छेउमै इँटा उद्योग खोल्ने तयारी गरेपछि स्थानीयवासी आन्दोलित बनेका छन् ।

उद्योगी गुणराज थापाले झापाको कमल गाउँपालिका १ स्थित रतनचौनमा गाउँलेको असहमति हुदाँहुदै जबरजस्ती इँटा उद्योग खोल्न लागेकोमा वातावरणमैत्री समाज निर्माणका लागि प्रदूषण युक्त उद्योग विरुद्ध भन्दै उनीहरूले बुधवार पत्रकार सम्मेलनको आयोजना गर्दै त्यसको घोर विरोध गरेका हुन् । उद्योगी थापाले सो स्थानमा निजी स्वामित्वमा रहेको १६ बिघा जमिनमा इँटा उद्योग खोल्ने भनी २०७३ साल कार्तिक ९ गते गाउँपालिकाबाट  पहिलो पटक एउटा पत्र आएको थियो। गाउँलेको हातमा पत्र परेपछि त्यही पत्र लिएर तत्काल गाउँपालिका पुगेर विरोध गरेको स्थानीय तुलसीराम दंगालले बताए।

गाउँपालिकाका उपाध्यक्ष वेणु शिवाकोटीले गाउँलेको सहमतिबिना इँटा उद्योग खोल्न नपाइने आश्वासन दिएपछि ढुक्क भएर फर्किएको उनले बताए । त्यसपछि इँटा उद्योगविरुद्ध ३२० जना गाउँलेको हस्ताक्षर गराएर गाउँपालिकामा निवेदन दर्ता गराएको भन्दै उनले भने, ‘गाउँपालिकाको सिफारिस पत्रसहित घरेलु तथा साना उद्योग कार्यालय भद्रपुर पुगेर त्यस विषयमा जानकारी गराएको थियौँ।’

तर उद्योगी थापाले केही कुण्डले मुण्डलेको आडमा गाउँवासीलाई कहिले इँटा उद्योग त कहिले सिमेन्ट उद्योग खोल्ने भन्दै बारम्वार उत्तेजित बनाउँदै आएको दंगालले बताए । ‘उद्योगी थापाले गाउँवासीलाई धम्काउने, तर्साउने र फकाउने कर्तुतमा लागेर उद्योग खोल्ने तयारीमा लागेको गाउँले थाहा पाएपछि हामी त्यसको प्रतिकारमा उत्रिएका हौँ,’ । अर्का स्थानिय नरेन्द्र गौतमको भनाई छ ।

 इँटा उद्योगको वायु प्रदूषणले वातावरण ठुलो असर पर्ने भएकोले त्यसको विरोधमा उत्रिएको युवा नेता रविन ढुङ्गानाको भनाई छ ।

‘वायु मण्डलमा पिएम नाम कणको मात्रा ४० हुनु पर्नेमा इँटा उद्योगबाट निस्किने प्रदूषणको मात्रा त्यसलाई बढाएर ५ सय बनाउने काम गर्छ,’ उनले भने,  ‘जुन वातावरणको लागि खतरनाक वायु हो, त्यसैले हामी इँटा उद्योग खोल्न दिने पक्षमा छैनौँ।’ ‘वातावरणमैत्री उद्योग वा पार्क खोल्न आएमा त्यसको हामी स्वागत गर्छौ,’ उनले भने।
उद्योगी थापाले स्थानीयको विरोधका बाबजुत प्रदूषण फैलाउने र मानव बस्तीलाई विस्थापित गराउने उद्देश्यले उद्योग खोल्ने तयारीको वर्षौँदेखि नै विरोध गर्दै आएको स्थानीय सन्तोष कटुवाल बताउँछन्।

उद्योगीले पहिले कुरा मात्र गर्ने गरेको तर यस पटक  उद्योगको  संरचना निर्माणका लागि सरसामान नै झार्न थालेपछि स्थानीयहरू संगठित बन्दै आन्दोलनमा उत्रिएको उनको भनाइ छ। ‘अब हामी वारपारको अवस्थामा पुगेका छौँ, यसका लागि रगतको खोला पनि बग्छ,’ उनले भने।

त्यस्तै स्थानीय सविता कटुवालले उद्योगी दादागिरी शैलीमा इँटा उद्योग खोल्न लागेकाले त्यसको प्रतिकारमा उत्रिएको बताइन् । टोल विकास संस्था, नागरिक समाज, गाउँवासीको सहमतिबिना कुन कानुनले इँटा उद्योग खोल्ने अनुमति दिएको प्रश्न गर्दै उनले भनिन्, ‘पैसा र शक्तिको आडमा कानुनलाई लत्याएर जे पनि गर्न पाइन्छ ?’

यता कमल गाउँपालिका १ नम्बर वडाध्यक्ष केदार कटुवालले गाउँमा इँटा उद्योग खोल्ने विषयमा वडा कार्यालय र गाउँपालिकामा आधिकारिक रुपमा केही सूचना र पत्र नआएको बताए।

उद्योगीले कहाँबाट अनुमति ल्याएर उद्योग खोल्ने तयारीमा लागेको आफू पनि आश्चर्यमा परेको उनको भनाइ छ। उद्योग खोल्ने विषयमा वडा कार्यालयबाटै सरजमिन हुनुपर्ने बताउँदै उनले यस विषयमा आफूलाई पनि थाहा नभएको प्रतिक्रिया दिए।

उद्योगी थापाले पैसा र आफ्नो निकटका सम्बन्ध भएका मानिसहरूलाई प्रलोभनमा पारेर मानव स्वास्थ्य र स्थानीयलाई विस्थापित गराउने खेलमा लागेकाले यसविरुद्ध जस्तोसुकै कदम चाल्न पछि नपर्ने स्थानीयबासीहरुले बताएका छन् ।

Categories
जीवनशैली देश प्रवास ब्यापार मनोरञ्जन मुख्य राशिफल विचार स्वास्थ/ शिक्षा

२०७७ माघ १३  गते , ई.सं.२०२१ जनवरी २६ तारिक मंगलबार यो राशि भएकालाई राम्रो छ      

आजको पञ्चाङ्ग
मिति २०७७-१०-१३ गते मङ्गलबार तदनुसार ई.सं.२०२१-१-२६, प्रमादी नाम संवत्सर, श्रीशाके १९४२, सूर्य उत्तरायण, शिशिर ऋतु, पौषशुक्लपक्ष त्रयोदशी तिथि, आर्द्रा नक्षत्र, वैधृति योग,कौलव करण, चन्द्रमा मिथुन राशिमा।।
सूर्योदय बिहान ६:४४ बजे,
सूर्यास्त साँझ ५:२७ बजे।
गौरादह झापा : सम्पर्क नं- ९८४२१६५५८७
यूवा ज्यो.पण्डित नेत्र प्रसाद खनाल

नोट : ग्रहदशा हेर्ने , चिना टिपन बनाउन,वास्तु परामर्श सेवा, पुजापाठ, पुराण वाचन साथै ज्योतिष सम्वन्धि सम्पूर्ण कार्यकालागि अवस्य सम्झनुहोला ।